مش أى حاجة بيضة حلوة تبقى وزة

مش اى حاجة بيضة حلوة تبقى وزة
ولا اى بت لابسة كات تبقى مُزة

دى كلمات أغنية بيئة جدًا من اللى بيلوثوا الودان ...... بس طبعا متقدرش تمنع نفسك من إنك تسمع أغنية زى دى و إنت ماشى فى منطقة شعبية أو وإنت داخل محل أو حتى و إنت بتقلب فى التلفزيون
ما علينا من الاغنية اللى حتى مش عارفة مين بيغنيها
بس عمرك فكرت تسأل شاب كده زى الورد "أو زى الزفت " مجهز حاله و معاه شقته و شبكته و مرتبه و بيدور على عروسة عايز مواصفات عروستك ايه يمكن ارشحلك حد من عندى ؟؟؟؟؟
ممكن يكون ربنا رحمك و مسمعتش الرد ..... أما بقى لو كنت سمعت الرد الكارثة فحيبقى بيتلخص فى كام كلمة تتصدرهم كلمة " بيضا"  " لا و الله !!!!!
مسلوقة ولا مقلية ؟؟؟ "
ده بجد ؟؟؟؟ ...... يعنى اول طلب أو حلم من أحلامك إنها تكون بيضا؟؟؟؟
أمال فين الدين و العقل ؟؟؟ .... طب و فين الأخلاق و الرزانة ؟؟؟؟ طب اقولك اقولك اقولك فين الرقة و الشياكة و الأنوثة

ليه الصفات دى متتقدمش على انها تكون بيضاء ..... طب و السمرا مالها ؟؟؟؟ وحشة مثلا؟؟؟
قمة العنصرية ..... افظع من عنصرية هتلر ضد اليهود

تخيل معايا كدة إن بنت إتقدملها واحد أول مرة يشوفها و البيه طبعًا معجبتوش لمجرد إنها سمراء فيرفض او يقول الكلمة المشهورة " محصلش نصيب " و طبعا مع ضغط الأم عالوسيط عشان يقول سبب الرفض :"معلش أصلها سمراء "
ينهاااااااااااااااااااااااااااااااااااااااااااااار ............................ بنت جميلة مؤدبة .... ,متدينة , متعلمة , و .... و.... و.....  تترفض عشان البيه عايزها اومليت .
 دا انا منساش مرة جدتى كانت بتكلم اختها ..... بتباركلها على خطوبة حفيدها و و بتقولها بقى ايه  :" و عروسته ايه بيضا و حلوة كدة " !!!!!!!!!!!!!!!!!!
انتى اكيد بتهزرى دى العنصرية إنتقلت من الشباب للستات و الغريبة إن جدتى نص أحفادها البنات سُمر .......... يعنى ما يتجوزوش عشان سمر بقى ولا ايه؟؟؟
الناس اللى بتتكلم دى عمرهم ما شافوا مسابقة ملكة جمال العالم قبل كدة و ان تقريبا معظم اللى بيكسبوا سُمر !!!! ..... طب محدش منهم شاف فيلم لاشواريا راى تلك الجميلة السمراء التى لا مثيل لها ؟؟؟؟
نفسى نبقى اقل عنصرية و اكثر موضوعية
قعدت افكر فى الكلام دة لقيتنى قى الأخر بغنى
" مش أى حاجة بيضة حلوة تبقى وزة
و لا أى بت لابسة كات تبقى موزة "
:)