عملتى إيه فى الأجازة ؟!!
سؤال بادرتنى بيه طالبتى الأمريكية اللى بعلّمها لُغة عربية .. مكنتش قصدها أجازِة الصيف و لا أجازِة نُص السنة .. كان قصدها على أجازة أخِر الإسبوع " نُص الخميس و الجُمعة و الَسبت " .. لتالت إسبوع على التوالى تسألنى السؤال دا و ملاقيش إجابة مُرضية ليها ..
!!!أصل بالنسبالها الأجازة حاجة مُقدسة " الله - الوطن - الأجازة " إزاى مبقاش بخرُج و بتفسح فيها يعنى !!
مرضيتش أقولها إن فيه شهرين عدّوا عليّا فى أخِر ترم فى الكُلية مخدتش فيهُم ولا يوم أجازة .. 60 يوم متواصِل بنزِل من البيت عشان أحضر مُحاضرات " مش محتاجة طبعا أَوصِف كمية الإرهاق اللى كُنت حاسة بيها " مش أنا بس .. أنا و كُل زمايلى فى الكُلية و الدكاترة اللى كانت بتنزل يوم الجُمعة عشان تشرح فى المُحاضرات دى .. طب إحنا و العبد المأمور .. طب الدكاترة دى ليه مبتحترمش أيام أجازتها .. ليه متحترمش عقلها و جسمها و أسرِتها و تمنحُهم وقت و إهتمام .. إحنا ليه فى مصر مبنحترمش الأجازة ؟؟!! .. ليه ما بنتفسحش ؟!! ..
من إسبوع سمعنا عن جريمة قتل حصلت فى إسكندرية لأُم قتلت طفلينها .. و السبب إنُهُم بيزنوا عايزين يتفسحوا !!! ممكن تكون " دا ظروفهُم المادية مش سامحة ليهُم و دا كان ضغط عليها عشان مش قادرة تحقق رغبتهُم " دا مش مُبرِر دا تحليل ".
طب تعالوا نتكلم بصراحة كِدا .. مين فينا عارِف يُخُرُج بسبب الظروف اللى فيها البلد .. مُظاهرات كُل يوم و قطع طُرُق .. و لو مفيش مُظاهرات تحرُش فى الشوارِع .. ولو مفيش لا مُظاهرات ولا تحرُش برضُه مش حنُخرُج لإن دى ثقافتنا .. محدش بيقدر أهمية إنُه يفصِل و يريح جسمُه و عقلُه و أعصابُه .. التمشية عالبحر و لا عالنيل و لا لمّة حلوة فى بيت العيلة مش حتتكلف كتير .. بس حتفرِق معاك كتير ..
أُخرُجوا .. إفرحوا .. إتفسَحوا .. قَدِسوا الأجازة .. الأجازة تستحِق التقديس !
No comments:
Post a Comment