أنا حقا أحتج ..

أحا يا عم إيه الكلام دا ؟
أحا إيه عيب ما تقولش أحا ..
حوار سمعتُه و أنا صُغيرة عرفت منُه إنها كلمة عيب و بحُكم كونى كُنت مُراهِقة مؤدبة و ما بشتمش سمعت الكلام و مفكرتش لا أسأل يعنى إيه ولا إنى أقولها ..
لما طلع الفيسبوك و تويتر كنت دايما بلاقى الناس بتكتبها فى تعليقاتهُم لمّا بيعبروا عن غضبهُم أو ضيقهُم أو بالأخص إحتجاجهُم على حاجة ..

لحد ما قريت مرة إنها إختصار لعبارة " أنا حقا أحتج " زى ما حسيت و زى ما فهمت .. جملة تُعبر عن الإعتراض .. طب إيه اللى حولّها من كلمة فيها أبسط حقوقك و هى تعبيرك عن الإعتراض أو الإحتجاج لكلمة أبيحة و عيب مش من الأدب إنها تتقال .. و إيه أصلا خلاها إختصار و من إمتى إحنا شعب بنختصر العبارات و نقولها بأول حروف منها ؟!!

الأسطورة بتقول إن فى وقت جه عالناس القانون و الحكومة و الحاكم تقريبا فى العصر الفاطمى منعوا الإحتجاجات و كانوا بيسجنوا و بيعدموا اللى بيحتج و يعترض و الناس إضطرت إنها تتكلم عن الإحتجاج و الإعتراض بطريقة متواربة بطريقة يعبروا بيها عن رأيُهُم و فى نفس الوقت محدش يفهمها " أهو تنفيث " ف إختصروا عبارة أنا حقا أحتج و أخدوا أُول حرف من كل كلمة و كتبوها " أحا " و بما إن الإحتجاج ممنوع ف بقت كلمة أحا عيب عشان بتودى ورا الشمس و جيل ورا جيل ال أحا و الإعتراض و الإحتجاج بقى عيب .. عيب تقولها و عيب تعبّر عنها ..

من كذا شهر وائل غنيم حط فيديو على تويتر و الفسبوك إسمُه 2+2=5 لمدرس بيدخُل الفصل بيكتب مسألة عالسبورة 2+2= ....  و بعدين سأل طالب على الإجابة الطالب قالُه 4 .. المدرس قالُه غلط .. الإجابة 5 .. الولد قالُه لأ أربعة و بدأ يحتج و يعترض على الإجابة مدرسُه الغلط .. المدرس طلب منُه يرجع مكانُه و قوم طالب تانى الطالب قال 4 برضُه .. المدس قالُه لأ خمسة و ضربُه .. الولد راح قال 5 .. بدأ يقول للفصل كلُه 2+2 = ... نُص الفصل قال 4 و النُص التانى قالى 5 و كان أعلاهُم صوتا الطالب الأول .. المدرس ضرب الطالب الأول ضرب مُبرح .. ضرب يُفضى إلى الموت .. و ببعدها سأل الفصل كلُه 2+2 = ... , رد الفصل كُلُه و بعلو صوتُه
2+2= 5 ...
http://www.youtube.com/watch?v=1DCCwQm006A

 أحا كلمة عيب عشان بتدُل على إحتجاج بالظبط زى 2+2 = 5 .. رُعب إتزرع جوا قلوب ناس و نتيجتُه ناس حافظة مش فاهمة