النداهة ..

أنا الخط الفاصل بين الغريق وبين الأمان ..
أنا الرغبة اللي عُمر ما جالها الجرأة ..
الجندي اللي عمره ما إتطمن وهو نايم عالحدود ..
لعنة تصيبك إنت وقلبك واللي حواليك ..
لا تقدر ما تحبنيش ولا تعرف معايا تعيش ..
صور إتاخدت على فجأة حتهرب منها وم السهوة..
سِنَّة العصاري اللي لازم حتصحى منها مفجوع من الوَقعة ..
أساطير حبِيتها و ولا عُمرَك صدقتها ..
 مراجيح بتطلع للسما أنا رَعشة قلبك وتشبيثة إيدَك وقتها ..
الرُصاصة اللي لا تزال في جيبَك ..
شايلها لوقت عوزة بس مش حتستغنى عنها ..

أنا القلق أنا الخوف ..
أنا الحُب أنا الحُضن ..

شرودك وإنت بتقرأ وخيالاتَك قبل ما تنام ..
كلام سمِعتُه وعجبَك بس مش فاهِم معناه ..
أنا كُل حاجة إنت عايزها .. وكُل حاجة إنت رافِضها..
أنا النداهة ..