المنبه ..

الحقيقة أول مرة أكتب وأنا مش عايزة أكتب .. أو بمعنى أصح معنديش حاجة أقولها .. بس أنا بكلم نفسي كتير جدًا .. والناس بدأت تقفشني بضحك وأنا قاعدة لوحدي ودا بيكون مش بسبب إني إفتكرت حاجة لا دا بسبب إني ألفت كلام وضحكت عليه .. 

طب وليه ما أكتبش الكلام اللي بيني وبين نفسي دا وأسجله حتى لو مش حوريه لحد .. يمكن ييجي يوم وحد يحب يقراه .. أو يمكن حد يقراه ويحبه .. أو يمكن يكون كلامي مع نفسي بالكتابة يكون سبب في تحسين إسلوبي أكتر وينفعني بعد كدا .. أخدت القرار دا كمان بُناءًا على إصرار صديق كُل كام يوم يسألني كتبتي حاجة جديدة ولا لأ .. على قد ما بيفرحني إنه مستني مني جديد .. على قد ما بيزعلني عشان مكتبتش حاجة .. أحلى إحساس بحسه بعد ما أخلص كتابة حاجة جديدة وحد يقراها ويقولي إنها كويسة .. أو إنها عجبته .. بحس إني عايشة .. بحس إني أنا .. زمان كُنت بكتب أكتر من كدا بكتيييير .. أنا حتى كنت بكلم ربنا بالكتابة .. فيه فترة في حياتي عدّت عليّا كنت مكتئبة جدًا .. وبعدت عن الكتابة .. بعدت عن كُل حاجة .. نسيت نفسي .. أه والله حرفيًا نسيت نفسي .. مكنتش بعمل إي حاجة .. خمس سنين .. من وأنا عندي 14 سنة لحد 19 سنة .. فترة في وقت حرج جدًا في تكوين الشخصية .. وقفت كتابة .. وقفت إكتشافي لذاتي .. وقفت أفرح .. وقفت أهتم .. وقفت أحس .. عشان كدا تقريبًا عندي تأخُر في حياتي كبير جدًا .. تأخُر في نُضج المشاعر بالذات .. أنا مراهقة عندها 23 سنة يا سادة !! .. لحد ما حصلت حاجة ما كانتش حلوة جدًا الحقيقة بس كانت بمثابة مش صدمة ولا ضربة ألم .. نقدر نقول صوت المنبه اللي بتصحى عليه الصُبح .. إصحييييييييييي !! فوقي .. الله ! دا الناس عايشين أهو ! الله ! .. دول بيتحركوا كمان .. دا في حاجة إسمها إحساس !! .. وفي حاجة إسمها فَرْح .. دا في إله فوق بيسمعنا " أيوه كُنت فقدت إحساسي حتى بربنا " .. والصراحة المنبه كان مفعول ضربتين في الراس ورا بعض .. ضربه صحّت إحساسي بربنا .. والضربة التانية صحّت تلك المُضغة يسارًا .. الضربتين ماديًا ما إستفدتش منهم إي حاجة .. لكن معنويًا رجعوني لربنا ورجعوني للكتابة .. أنا سعيدة بالمنبه جدًا .. رغم الصُداع اللي عملهولي .. بس الحقيقة لحقني قبل ما يفوت المعاد .. كُلنا في حياتنا منبهات .. بتصحينا .. بتقولنا إوعوا المعاد يفوتكم .. بتوجهنا للوقت .. بتقولنا ما تضيعوش عمركم في حاجة واحدة .. في دُنيا تانية مستنياكم .. إصحوا .. عيشوا ..