قالي عدّي وما تخافيش ..
كنت ماشية في الشارع على الرصيف وكان جيّ عكسي شابين ماشيين .. شكلهم عادي يعني .. شبه أخويا وأخوكي وأخو مراتك .. وعشان أعدي كان لازم حد ييجي على جنب .. وعادةً البنت هي اللي بتيجي على جنب .. ودا في الغالب بيكون نابع من خوف .. بتتحامى في الحيطة مثلًا عشان ظِل الراجل ساعات بتكون إيديه طويلة حبتين .. الشاب عمل حركة غريبة جدًا .. جه هو على جنب وقالي " عدّي وما تخافيش " .. الفكرة مش في الكلمة .. نبرة صوته كان فيها نفس وقع جملة " السَّلَامُ عَلَيكُم " .. كأنه بيبرأ نفسه من مواقف مشابهة كتير .. أو كأنه مش بيقولهالي أنا بس .. دا بيقولها لكل بنت حس إنها كانت خايفة وهي ماشية .. كأنه بيدافع عني ويقولي يلعن أبو اللي خلاكي تخافي كدا .. متخافيش دي حسيتها مش بيقولهالي بس في الموقف دا .. لأ متخافيش النهاردة وبكرة وبعده .. متخافيش كُل يوم .. وما يهمكيش أي حد .. حسيت كمان إني كان نفسي أسجلها عشان أسمعها مثلًا بعد ما أخُد قرار ومش عارفة أنفذه إزاي .. أو وأنا مكتئبة مثلًا أسمعها فأنسى سبب إكتئابي وأعدي وأبطل أخاف .. أو وأنا رايحة مقابلة شغل ومش عارفة حيكون مصيرها إيه .. أو وأنا داخلة أو خارجة في علاقة مع حد ومش عارفة إيه اللي هيحصل .. أو ممكن كمان لما حد يضايقني فأعدي الموقف وأنساه وما أخافش أتعامل مع الناس تاني .. وأكمل حياتي وما تقفش على حد .. الكلمتين رغم بساطتهم بس فيهم بلاغة ودفء وطبطبة محستهاش في كلام كتير بيتقال وبيبقى في الأخر مالوش معنى .. حاضر حعدّي وحاضر مش حخاف يا إسمك إيه ياللي معرفش حتى شكلك ..
No comments:
Post a Comment