عايزة أشتغل ... مُمكن ؟؟ .. نفسى يبقى ليا كيان و حياة مُستقلة ؟؟ صعب ده ؟؟ .. عايزة شخصيتى تمُر بمراحل الحياة الطبيعية و تنضُج .. ينفع يعنى ؟؟ .. أحلامى اللى مينفعش تتحقق غير بالفلوس ينفع أحققها ؟؟ .. عايزة أحِس إنى مضيعتش سنين الكُلية عالفاضى و عُمرى ضاع هدر ... نِفسى مسخرش من نفسى لما أفتكر لما كُنت بقول حعمل إيه بأول مُرتب أقبضه .. نفسى محدش يفكرنى بالحاجات اللى كُنت بقول حجيبها لما أشتغل و يضحك على هبلى .. ما هو مش هبل إنى أقول حجيب و حجيب لإنه الطبيعى إنى أشتغل و ألاقى شُغل ... عايزة أشتغل عشان مبقاش طول النهار قُدام الزفت اللى حيعميلى عينيا و حيطرشنى و يجيبلى كُساح و سرطان على رأى أُمى ... عايزة أشتغل عشان مُخى ميفضاش من الفراغ و مع الوقت الناس تقول عليا تافهة و فاضية .. عايزة أشتغل عشان ما أفتحش صفحات فى حياتى كانت أنطوت منا حعمل إيه الفراغ وحش ... عايزة أشتغل عشان أبقى أقوى من إن حد يُداعب مشاعرى و فجأة يختفى ... عايزة أشتغل عشان بسمع إن فيه نوع من البشر مبنعرفوش إلا فى الشُغل عايزة أعرفة و أشوف ممكن أتعامل معاه إزاى ... عايز أشتغل عشان المليون صاحبة و صاحب اللى فى حياتى مش كفاية عايزة أشوف كُل البشر ... عايزة أشتغل عشان أشوف فرحتى لما حَد يقدر شُغلى و لا لما أترقى و أعلى و كُل يوم تقديرى لنفسى و لحياتى بيزيد ... عايزة أشتغل عشان فى يوم ما أحِسش إنه ضاع عُمر هدر
No comments:
Post a Comment